“Dan nou konferans lazenes lannen pase, nou ti donn nou langazman Parti, pour ki nou reste touzour angaze, solid e lwayal anver nou Parti ek nou bann dirizan.

Ozordi, nou’n vwar li en nesesite pour nou retournen e vin renouvle sa langazman ki nou ti fer lannen pase.
Nou renouvle sa langazman avek en mesaz lespwar. En mesaz lespwar pour nou bann zenn ki pe esper en lakaz, en mesaz lespwar pour nou bann zenn ki pe esper zot scholarship, en mesaz lespwar pour bann zenn professyonnel ki pa pe ganny travay dan son domenn akoz etranze in pran. En mesaz lespwar pour nou bann zenn paran ki vwar li difisil pour pran en bout pour met avek lot en bout pour donn zot zanfan. En mesaz lespwar pour bann zenn ki’n dezespere. En mesaz lespwar pour bann zenn ki dan sibstans ki santi zot in ganny rezete. Ozordi,mon pe donn zot en mesaz lespwar, ki lavi pa fini la. Annou redres nou. Annou debout for e repran ou plas dan sa sosyete. Vini vin ralye avek nou, deryer nou Parti e annou retroun nou Parti opouvwar pour en meyer Sesel e en meyer lavenir pour ou, e ou zanfan.”